اردوئے معلٰی

Zaroori tha koi humzaad rakhna....Faizan Arif

2012-01-18T13:01:00.003+05:00

نئے شہروں کی جب بنیاد رکھنا

پرانے شہر بھی آباد رکھنا۔۔

پڑی ہو پاؤں میں زنجیر پھر بھی

ہمیشہ ذہن کو آزاد رکھنا

کسی کی یاد جب شدت سے آئے

بہت مشکل ہے خود کو یاد رکھنا

دکھوں نے جڑ پکڑ لی میرے اندر

ضروری تھا کوئی ہمزاد رکھنا

خدایا !! شاخ پر کلیاں کھلانا

کوئی پودا نہ بےاولاد رکھنا

پڑاؤ ڈالنے والو ہمیشہ

گذشتہ ہجرتوں کو یاد رکھنا

کہیں بھی گھر بسا لینا جہاں میں

مگر اپنے وطن کو یاد رکھنا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2011-12-15T10:00:00.003+05:00

وہ کون ہے جو گھنی بارشوں سے خائف ہے

کسے عزیز ہے مٹی کا بے نمو ہونا۔۔۔۔۔۔۔۔۔۔۔۔۔

شمار ہونا بھی مشکل ہے کشتگاں میں یہاں

بہت کٹھن ہے قبیلے کی آبرو ہونا۔۔۔۔۔۔۔۔۔۔۔۔۔۔۔

:)

2011-10-06T10:09:00.001+05:00

نہ جانے کیا ہوا ہے سال بھر

دیا مدہم کہ روشن ہوگیا ہے

ہمیں معلوم ہے اتنا اک سال

ہماری عمر سے کم ہوگیا ہے

مجھے ان سارے جرائم کی اجازت چاہیے۔۔۔

2011-10-05T15:31:00.003+05:00

زندگی کے جتنے دروازے ہیں ،مجھ پر بند ہیں

حدِ نظر سے آگے دیکھنا بھی جرم ہے

سوچنا، اپنے یقینوں سے نکل کر سوچنا بھی جرم ہے

آسماں درآسماں اسرار کی پرتیں الٹ کر جھانکنا بھی جرم ہے

کیوں بھی کہنا جرم ہے

کیسے بھی کہنا جرم ہے

سانس لینے کی آزادی میسر ہے مگر

زندہ رہنے کے لیے''کچھ اور"بھی درکار ہے

اور اس ''کچھ اور بھی" کا تذکرہ بھی جرم ہے

زندگی کے نام پر بس ایک عنایت چاہیے

مجھے ان جرائم کی اجازت چاہیے

مجھے ان سارے جرائم کی اجازت چاہیے

:)

2011-09-19T17:53:00.002+05:00

درخت جاں پہ عذاب رت تھی نہ برگ جاگے نہ پھول آئے

بہار وادی سے جتنے پنچھی ادھر کو آئے ملول آئے

وہ ساری خوشیاں جو اس نے چاہیں اٹھا کے جھولی میں اپنی رکھ لیں

ہمارے حصے میں عذر آئے ، جواز آئے ، اصول آئے

Busssss!!!!!

2011-09-16T15:13:00.007+05:00

ایسا ٹوٹا ہے تمناؤں کا پندار کہ بس
دل نے جھیلے ہیں محبت میں وہ خار کہ بس

ایک لمحے میں زمانے میرے ہاتھوں سے گئے

اس قدر تیز ہوئی وقت کی رفتار کہ بس

تو کبھی رکھ کے دیکھ مجھ کو بازار کے بیچ
اس طرح ٹوٹ کر آئیں گے خریدار کہ بس

کل بھی صدیوں کی مسافت سے پرے تھے دونوں

درمیاں آج بھی پڑتی ہے وہ دیوار کہ بس

یہ تو ایک ضد ہے کہ میں شکایت نہ کروں

ورنہ شکوے تو اتنے ہیں میرے یار کہ بس

از اقبال خاور۔۔۔۔

2011-08-31T21:57:00.001+05:00

لوگ بےچہرہ ہوتے جارہے ہیں

وقت یہ آئینے پہ بھاری ہے۔۔۔

:)

2011-06-18T18:02:00.004+05:00

باری باری سارے گئے

دریا پار اتارے گئے

اک دو اپنے جیسے ہی

اکھڑ پن میں مارے گئے

...............................

2011-06-18T16:41:00.001+05:00

یہاں کس کا چہرہ پڑھا کریں

یہاں کون اتنا قریب ہے۔۔۔۔۔

From Diary...

2011-06-09T11:25:00.003+05:00

بہم رہ کر اگر بڑھ جائیں
دل کے فاصلے یک دم
بچھڑ جانے کا پھر تو فیصلہ یہ کربھی سکتی ہے
محبت مر بھی سکتی ہے

From My Diary

2011-05-27T17:26:00.002+05:00

فراز تُونے تو اسے مشکل میں ڈال دیا
زمانہ صاحب زر اور صرف شاعر تو

Good Morning.....

2011-05-20T10:22:00.005+05:00

میرے ہاتھ پہ لکھ دو
فیصلہ جدائی کا
اتنا مختصر لکھنا
جتنی مختصر تم نے مجھ سے محبت کی
اتنا مختصر لکھنا فیصلہ جدائی کا
جتنی میری سانسیں ہیں
فیصلہ جدائی کا
اگر طویل لکھوگے
تب میں پڑھ نہ پاؤں گی
کہ میں تو فیصلہ پڑھنے تک
زندگی کی ساتھی ہوں
اور
زندگی تمھاری ہے
تو
میرے ہاتھ پہ لکھ دو
فیصلہ جدائی کا

Just Added:)

2011-05-19T17:59:00.002+05:00

کس قدر بےساختہ پن چاہتی ہے زندگی
شاخ سے اڑتا پرندہ دیکھنا اور سوچنا

Recieved from Huma:)

2011-05-06T13:08:00.002+05:00

بول ہوا اُس پار زمانے کیسے ہیں
اجڑے شہر میں یار پرانے کیسے ہیں
چاند اترتا ہے اب کس کس آنگن میں
کرنوں سے محروم گھرانے کیسے ہیں
لب بستہ دروازوں پر کیا بیت گئی
گلیوں سے منسوب افسانے کیسے ہیں
محسن ہم تو خیروخبر سے بھی گئے
اپنے روٹھے یار نجانے کیسے ہیں

From my Diary.....

2011-05-04T10:59:00.003+05:00

دل کو رہیں گی یاد ہمیشہ یہ صحبتیں
ڈھونڈا کریں گےہم تمھیں فصلِ بہارمیں

From My Readings...

2011-04-15T16:01:00.001+05:00

شہاب نامہ سے اقتباس، قدرت اللہ شہاب کی یادیں

بیوی کی وفات پر

۔۔۔۔۔۔۔۔۔۔۔۔۔۔۔۔۔۔۔۔۔

17 جون ، 1974

آج عفت مر گئی

میں اُسے مذاقاً بڑھیا کہا کرتا تھا لیکن جب کنٹربری کاؤنٹی کونسل کے دفتر میں تدفین کا اجازت نامہ حاصل کرنے گیا تو ایک فارم پُر کرنا تھا اس میں مرحوم کی تاریخِ پیدائش بھی درج کرنا تھی ۔جب میں نے اُس کا پاسپورٹ نکال کر پڑھا تو میرا کلیجہ دھک سے رہ گیا۔اُس کی عمر تو صرف 41 برس تھی۔
لیکن میرے لئے وہ ہمیشہ " میری بڑھیا “ کی بڑھیا ہی رہی۔کنٹربری اسپتال میں ہم نے اُسے گرم پانی میں آبِ زمزم ملا کر غسل دیا پھر کفنایا اور جب اُسے قبلہ رو کرکے لکڑی کے بنے ہوئے ہلکے بادامی رنگ کے تابوت میں رکھا تو تنویر احمد خان نے بے ساختہ کہا ،ارے ! یہ تو ایسے لگتی ہے جیسے ابھی فرسٹ ائیر میں داخلہ لینے جا رہی ہو ۔
بات بھی سچ تھی جب میں اُسے بیاہ کر لایا تھا تو وہ لاہور کے فاطمہ جناح میڈیکل کالج کے فائنل ائیر سے نکلی تھی جب میں نے اُسے دفنایا تو واقعی وہ ایسی لگ رہی تھی جیسے ابھی ابھی فرسٹ ائیر میں داخلہ لینے جا رہی ہو ۔درمیان کے اٹھارہ سال اُس نے میرے ساتھ یوں گزارے جس طرح تھرڈ کلاس کے دو مسافر پلیٹ فارم پر بیٹھے ہوں ۔سامان بُک ہو چکا ہو ۔ٹرین کا انتظار ہو۔اُس کی گاڑی وقت سے پہلے آگئی۔وہ اُس میں بیٹھ کر روانہ ہو گئی ۔میری ٹرین لیٹ ہے ،جب آئے گی میں بھی اُس میں سوار ہوجاؤں گا لیکن سامان کا کیا ہوگا ؟
جو کبھی آگے جاتا ہے اور کبھی پیچھے اور کوئی اُسے وصول کرنے کے لئے موجود نہیں ہوتا ۔لیکن ہمارے سامان میں آخر رکھا کیا ہے ؟ کچھ کاغذ ،ڈھیر ساری کتابیں ،کچھ کپڑے،بہت سے برتن اور گھریلو آرائش کی چیزیں جنہیں عفت نے بڑی محنت سے سیلز میں گھوم گھوم کر جمع کیا تھا اور ایک ثاقب !
لیکن ثاقب کا شمار نہ سامان میں ہوتا ہے نہ احباب میں ۔یہ بارہ سال کا بچّہ میرے لئے ایک دم بوڑھا ہو گیا۔کنٹربری کے قبرستان میں جب مٹی کے گرتے ہوئے ریلوں نے عفت کے تابوت کا آخری کونہ بھی ہماری نظر سے اوجھل کردیا ،تو ہم دونوں جو بڑی بہادری سے کھڑے ہوئے یہ نظارہ دیکھ رہے تھے ،بیک وقت گھاس پر بیٹھ گئے۔ہمارے گُھٹنے ہمارے اندر کے بوجھ سے دب کر اچانک دہرے ہوگئے ۔چند لمحوں کے لئے ثاقب نے میرا ہاتھ اپنے ہاتھ میں لیا ،اُسے زور سے دبایا پھر خاموشی سے چھوڑ دیا۔ہم دونوں نے اب تک ایک دوسرے کے سامنے کبھی آنسو نہیں بہائے ،نہ آئیندہ ایسا کوئی ارادہ ہے ،لیکن صد حیف ! کہ اب میرے پاس وہ بچّہ نہیں جسے گلے لگا کر میں دھاڑیں مار مار کر روؤں ۔میرے پاس صرف ایک بارہ سال کا بوڑھا انسان ہے جو باپ کی طرح میری دیکھ بھال پر مامور ہوگیا ہے۔یہ گُر اس نے اپنی امی سے سیکھا ہے ۔ہماری شادی خانہ آبادی کے پانچ برس بعد جب ماں جی فوت ہوگئیں تو عفت نے بھی یہی چالاکی برتی تھی ۔ماں جی کے مرتے ہی فوراً عفت نے اُن کا کردار اپنا لیا تھا عین اسی طرح جیسے عفت کے مرتے ہی ثاقب میرا مائی باپ بن بیٹھا ہے۔
پتہ نہیں یہ ماں اور بیٹا کیسے لوگ ہیں ؟
یہ خود تو صبر وشکر کا بادبان تان کر ہنسی خوشی زندگی اور موت کے سمندر میں کود جاتے ہیں اور مجھے بےیارومددگار اکیلا ساحل پر چھوڑ جاتے ہیں جیسے میں انسان نہیں پتھر کی چٹان ہوں ۔خیر، اللہ انہیں دونوں جہاں میں خوش رکھے میرا کیا ہے ؟
میں نہ اِس جہاں کے قابل نہ اُس جہاں کے۔۔۔۔۔۔۔۔۔۔کوئی تنہائی سی تنہائی ہے ۔۔۔!
میرا خیال ہے کہ میری اس عجیب تنہائی کا احساس عفت کو بھی ضرور تھا ۔بات تو اُس نے کبھی نہیں کی لیکن عملی طور پر اُس نے اِس بےنام خلاء کو پُر کرنے کی بےحد کوشش کی۔یہ کوشش پورے اٹھارہ سال جاری رہی لیکن میرے لئے اس کا ڈرامائی کلائمیکس اُس کی وفات سے عین پندرہ روز پہلے وقوع پذیر ہوا۔
2 جون کی تاریخ اور اتوار کا دن تھا۔چاروں طرف چمکیلی دھوپ پھیلی ہوئی تھی عفت صبح سے ثاقب کے ساتھ ایک کیاری میں دھنیا ، پودینہ،ٹماٹر اور سلاد کے بیج بوا رہی تھی۔پھر اُس نے گلاب کے چند پودوں کو اپنے ہاتھ سے پانی دیا ۔اس کے بعد ہم تینوں لان میں بیٹھ گئے ۔عفت نے بڑے وثوق سے کہا " یہ کیسا سہانا سماں ہے ! غالباً بہشت بھی کچھ ایسی ہی چیز ہوگی ؟“
" پتہ نہیں ! “ میں نے کہا ۔
عفت کھلکھلا کر ہنس پڑی۔یہ اُس کا آخری بھرپور قہقہہ تھا جو میں نے سُنا ۔وہ بولی !تم مجھے کچھ نہیں بتاتے ،ممتاز مفتی جو لکھتے ہیں ،اُس سے مجھے احساس ہوتا ہے کہ وہ تمہیں مجھ سے زیادہ جانتے ہیں ۔آخر مجھے بھی تو کچھ بتاؤ ۔
میں نے کہا ! تم ممتاز مفتی کو جانتی ہو ؟ بہت بڑا افسانہ نگار ہے ،جو جی میں آئے لکھتا رہتا ہے ،اُس نے میرے سر پر سبز عمامہ باندھ کر اور اُس پر مُشک،کافور کا برادہ چھڑک کر مجھے ایک عجیب و غریب پُتلا سا بنا رکھا ہے ۔وہ دیدہ و دانستہ عقیدے سے بھاگتا اور عقیدے کا روگ پالتا ہے۔اُس کی کسی بات پر دھیان نہ دو ۔
وہ مسکرا کر بولی " یہ ممتاز مفتی بھی عجیب آدمی ہیں۔میرے ساتھ بڑی محبت کرتے ہیں۔ثاقب کے ساتھ گھنٹوں بچوں کی طرح کھیلتے ہیں لیکن وہ جب میرے ساتھ تمہاری باتیں کرکے جاتے ہیں تو مجھے یہ احساس ہونے لگتا ہے جیسے میں تمہاری بیوی نہیں بیوہ ہوں ۔“
" یہی تو اُس کی افسانہ نگاری کا کمال ہے ! “ میں نے کہا ۔
وہ تنک کر بولی " مفتی جی کو گولی مارو ۔۔۔۔۔ ! آؤ ! آج ہم دونوں عیش کریں ۔۔۔۔ !
اس ملک میں ایسی دھوپ روز روز تھوڑی نکلتی ہے ۔“
یہ کہہ کر وہ اُٹھی جلدی جلدی مٹر قیمہ پکایا ۔کچھ چاول اُبالے اور سلاد بنائی ۔ہمیں کھانا کِھلا کر وہ اپنے کمرے میں چلی گئی ۔جامنی رنگ کی شلوار قمیض پہنی ،ڈھیر سارا میک اپ کیا اور جب خوب بن ٹھن کر نکلی تو ثاقب نے بے ساختہ کہا ، " واہ واہ امی ! آج تو بڑے ٹھاٹھ ہیں ،اب تو ابو کی خیر نہیں ۔“
" زیادہ بک بک نہ کیا کرو ! “ اُس نے ثاقب کو ڈانٹا۔
تم اپنی سائیکل نکالو اور خالد کے گھر چلے جاؤ ۔شام کو طارق کی سالگرہ ہے ۔ہم بھی پانچ بجے تک پہنچ جائیں گے۔
ثاقب نے گھڑی دیکھ کر شرارت سے کہا ،امی ! ابھی تو صرف دو بجے ہیں ! پانچ بجے تک آپ اکیلی کیا کریں گی ؟
ہم مزے کریں گے ! عفت نے کہا ، اب تم جاؤ !
ثاقب اپنی بائیسکل پر بیٹھ کر خالد کے ہاں چلا گیا ،میں نے عفت سے کہا ، آج تو تم زبردست موڈ میں ہو، بولو کیا ارادہ ہے ؟
اُس کی آنکھیں ڈبڈبا گئیں کہنے لگی ، اب میں تمہارے کسی کام کی نہیں رہی ،چلو پارک چلیں ۔
ہم دونوں ٹیکسی کرکے اُس کے ایک پسندیدہ پارک میں چلے گئے ۔چاروں طرف جوان اور بوڑھے جوڑے ایک دوسرے کے ساتھ لپٹے ہوئے سبز گھاس پر لیٹے ہوئے تھے بہت سے فوارے چل رہے تھے ،گلاب کے پھول کِھلے ہوئے تھے ۔چیری کے درخت گلابی اور سرخ پھولوں سے لدے ہوئے تھے ۔آس پاس ٹھنڈے دودھ اور رنگارنگ مشروبات کی بوتلیں بِک رہی تھیں ،ہم دونوں لکڑی کے ایک بنچ پر ایک دوسرے سے ذرا ہٹ کر بیٹھ گئے۔
اُس نے چاروں طرف نظر دوڑائی اور بولی !
" بہشت کا نظارہ بھی کچھ ایسا ہی ہوتا ہوگا ؟“
پتہ نہیں ! میں نے کہا ۔
تم مجھے کچھ نہیں بتاتے ۔۔۔۔۔۔۔ “ اُس نے شکایت کی ۔
ممتاز مفتی تمہیں مجھ سے زیادہ جانتا ہے ۔
مفتی جی افسانہ نگار ہیں ، میں نے کہا ! ان کو گولی مارو ،اپنی بات کرو ۔“
میری بات صرف اتنی ہے کہ میں تیرے کسی کام نہ آسکی ۔ ،وہ بولی !
یہ فضول بکواس چھوڑو ،میں نے کہا ! کوئی کام کی بات کرو ۔
واقعی کروں ؟ اُس نے ایسے انداز میں کہا جیسے کوئی بچہ ٹافی خریدنے کے لئے خوشامد کرکے پیسے مانگنے والا ہو ، برا تو نہیں مناؤ گے ؟
بات کاٹو گے تو نہیں ؟ ٹالو گے تو نہیں ؟
بالکل نہیں ۔۔۔۔۔میں نے اُسے یقین دلایا۔
وہ لکڑی کے بنچ پر مجھے تکیہ بنا کر لیٹ گئی اور بولی ۔
سنو ! جب میں مر جاؤں تو مجھے کنٹربری کے قبرستان میں دفنا دینا “
اُس کے منہ سے موت کا یہ پیغام سُن کر مجھے بڑا شدید دھچکا لگا لیکن میں نے اُس کی بات نہ کاٹنے کا وعدہ کر رکھا تھا ۔اس لئے بالکل خاموش رہا۔
وہ بولتی گئی ۔۔" یہ شہر مجھے پسند ہے ۔یہاں کے اسپتال نے مجھے بڑا آرام دیا ہے ۔یوں بھی اس شہر پر مجھے حضرت مریم کا سایہ محسوس ہوتا ہے ،یہاں پر تمہیں بھی کچھ محسوس ہوتا ہے یا نہیں !!!!!!! ؟
اُس نے منہ اُٹھا کر میری طرف دیکھا ۔میری آنکھوں سے آنسوؤں کا سیلاب اُمڈ رہا تھا ۔اُس نے اپنے جامنی رنگ کے ڈوپٹے کے پلّو سے میرے آنسو پونچھے اور بے حد غیر جذباتی انداز میں اپنا سلسلہ کلام جاری رکھا ،اس ملک میں ہر شخص اپنے کام میں مصروف ہوتا ہے ،اس لئے میرے جنازے پر کسی کو نہ بُلانا ۔یہاں پر تم ہو ،ثاقب ہے،خالد ہے ،زہرہ ہے ،آپا عابدہ ہیں ،خالد کے گھر چند مسلمان ڈاکٹر دوست ہیں ۔۔۔۔۔بس اتنا کافی ہے ! “
اب میں سنبھل کر بیٹھ گیا ، بزنس آخر بزنس ہے ‌!!!!!
میں نے کہا ،جرمنی سے تنویر احمد خاں اور پیرس سے نسیم انور بیگ شائد آجائیں۔ان کے متعلق کیا حکم ہے ؟؟؟؟؟؟
وہ آجائیں تو ضرور آجائیں ، اُس نے اجازت دے دی ۔وہ بھی تو اپنے ہی لوگ ہیں،لیکن پاکستان سے کوئی نہ آئے !!!!!!
وہ کیوں ؟؟؟؟ میں نے پوچھا ۔
وہ بولی ، ایک دو عزیز جو استطاعت رکھتے ہیں ضرور آجائیں گے لیکن دوسرے بہت سے عزیز جن میں آنے کی تڑپ تو ہے لیکن آنہیں سکتے ،خواہ مخواہ ندامت سی محسوس کریں گے ۔ ٹھیک ہے ناں ؟؟؟؟ “
میڈم ! آپ کا اشارہ سر آنکھوں پر ! میں نے جھوٹی ہنسی سے کہا ۔
اور کوئی ہدایت ؟؟؟؟؟؟
میری قبر کے کتبے پر لاالہٰ الا اللہ محمد رسول اللہ ضرور لکھوانا ۔“
ضرور ۔۔۔۔۔ ! “ میں نے کہا ۔
اور کوئی حکم۔۔۔۔۔۔۔۔ ؟؟؟؟؟؟
ہاں ! ایک عرض اور ہے ! ۔۔۔۔۔۔ اُس نے کہا ۔۔۔۔۔۔
اپنے ہاتھوں کے ناخن بھی خود کاٹنا سیکھ لو ۔دیکھو اس چھوٹی سی عمر میں ثاقب کیسی خوبی سے اپنے ناخن کاٹ لیتا ہے ! تم سے اتنا بھی نہیں ہوتا ۔۔۔۔۔۔۔۔۔۔
یہ کہہ کر وہ اُٹھی اپنا پرس کھولا ،ایک چھوٹی سی قینچی نکالی اور بولی لاؤ ، آج میں پھر تمہارے ناخن تراش دوں ۔“
اُس نے میرے ناخن کاٹے ۔اُس آخری خدمت گزاری کے بعد وہ میرے گلے میں بانہیں ڈال کر بیٹھ گئی اور اپنے ہاتھ کی انگلیوں سے میرے بالوں میں کنگھی کرنے لگی ۔مجھے اچھا تو بڑا لگا ،کیونکہ اس سے پہلے ہم برسرِعام اس طرح کبھی نہ بیٹھے تھے لیکن اُس کی باتوں میں الوداعیت کا جو پیغام چھلک رہا تھا اُس نے مجھے بے تاب کردیا۔
میں نے کہا ! میڈم اُٹھو !!!!! ہمارے ارد گرد جو بے شمار بچے کھیل کود رہے ہیں ،وہ کیا سمجھیں گے کہ یہ بڈھا بڈھی کس طرح کی عاشقی میں مبتلا ہورہے ہیں ؟؟؟؟ !!!!!!
وہ چمک کر اُٹھ بیٹھی اور حسبِ دستور مسکرا کر بولی ،یہ لوگ یہی سمجھیں گے ناکہ کوئی بوالہواس بوڑھا کسی چوکھری کو پھانس لایا ہے ۔کبھی تم نے آئینے میں اپنی صورت دیکھی ہے ؟؟؟؟
ہاں ! روز ہی دیکھتا ہوں ، میں نے کہا۔۔۔۔۔۔۔۔
اُس نے میرے بالوں میں اپنی انگلیوں سے آخری بار کنگھی کی اور بولی " تمہارے بال کتنے سفید ہورہے ہیں ۔میں نے اتنی بار کہا ہے کہ مہینے میں کم از کم ایک بار کلر شیمپو کیا کرو لیکن تم میری کوئی بات نہیں مانتے ۔“
میں خاموش رہا۔۔۔۔۔۔
اُس نے مجھے گدگدا کر ہنسایا اور کہنے لگی ۔۔۔۔۔تمہیں ایک مزے کی بات سناؤں ؟؟؟
ضرور سناؤ۔۔۔۔۔میں نے کہا۔
وہ بڑے فخریہ انداز میں کہنے لگی ، کوئی دو برس پہلے میں نسیم انور بیگ کی بیگم اختر کے ساتھ آکسفورڈ اسٹریٹ شاپنگ کے لئے گئی تھی ۔وہاں اُس کی ایک سہیلی مل گئی ،اُس نے میرا تعارف یوں کرایا کہ یہ عفت شہاب ہے ۔یہ سُن کر اختر کی سہیلی نے بے ساختہ کہا ، ارے ! ہم نے تو سنا تھا شہاب کا صرف ایک بیٹا ہے۔ہمیں کیا معلوم تھا کہ اُن کی اتنی بڑی بیٹی بھی ہے، دیکھا پھر !!!!!!!“
ہاں ہاں بیگم صاحبہ ! دیکھ لیا۔۔۔۔۔میں نے جھینپ کر کہا،پانچ بجنے کو ہیں ۔۔۔۔۔چلو ! طارق کی سالگرہ پر بھی تو جانا ہے۔
یہ ہمارا آخری انٹرویو تھا ۔اٹھارہ سال کی ازدواجی زندگی میں ہم نے کبھی ایک دوسرے کے ساتھ بیک وقت اتنی ڈھیر ساری باتیں نہ کی تھیں ،دوستوں ،یاروں اور عزیزوں کے ساتھ بیٹھ کر ہم کئی کئی گھنٹے ہی ہی،ہا ہا کر لیتے تھے لیکن اکیلے میں ہم نے اتنی دل جمعی کے ساتھ اتنے موضوعات پر کبھی اتنی طویل گفتگو نہ کی تھی ۔یہاں تک کے جب میں نے سی ۔ایس۔پی سے استفعی دیا ۔تو یوں ہی ایک فرض کے طور پر مناسب سمجھا کے اپنی بیوی سے بھی مشورہ کرلوں ۔جب میں نے اُسے بتایا کہ میں ملازمت سے مستفعٰی ہونا چاہتا ہوں تو وہ ثاقب کے اسکول جانے سے پہلے اُس کے لئے آملیٹ بنا رہی تھی ۔آملیٹ بنانے کا چمچہ ہاتھ سے چھوڑے بغیر اور میری طرف آنکھ اُٹھائے بغیر وہ بولی۔۔
اگر تمہارا یہی فیصلہ ہے ، تو بسم اللہ ! ضرور استفعٰی دے دو ۔
اُس کی اس شانِ استغنا سے جل کر میں نے شکایتی لہجے میں کہا ،بیگم صاحبہ ! آپ کی رضامندی کے بغیر میں ایسا قدم کیسے اُٹھا سکتا ہوں ؟ اور ایک آپ ہیں کہ کوئی توجہ ہی نہیں دیتیں۔
اُس نے چمچہ ہاتھ سے رکھ دیا اور میری طرف یوں پیار سے دیکھا جیسے پہلے کبھی نہ دیکھا تھا پھر بولی ۔۔۔۔۔
ارے یار ! میں تجھے کیسے سمجھاؤں کہ جو تیری مرضی وہ میری مرضی ۔
مجھے یہ زعم تھا کہ میں خود فنا کی تلاش میں ہوں لیکن مجھے کیا معلوم تھا کہ عفت پہلے ہی اس مقام سے گزر چکی ہے ۔جب وہ تابوت میں لیٹی ہوئی تھی ،تو میں نے چپکے سے اُس کے سر پر آخری بار ہاتھ پھیر کر پیار کیا۔میرے اندر کے توہمات نے میرے سینے میں عجیب و غریب اُمیدوں کی موم بتّیاں سجا رکھی تھیں لیکن اُن میں سے کسی معجزے کی ایک بھی موم بتّی روشن نہ ہوئی۔وہ مر گئی تھی ! ہم نے اُسے قبرستان میں لے جا کر دفنا دیا۔باقی اللہ اللہ خیر سلّلا ۔
یوں تو آپس کی روٹھ راٹھ ،چھوٹی موٹی ناراضگیاں اور باہمی شکر رنجیاں ہمارے درمیان درجنوں بار ویسے ہی ہوئیں جیسے ہر میاں بیوی کے درمیان ہونا چاہییں لیکن ہماری اصلی بڑی لڑائی صرف ایک بار ہوئی۔اسلام آباد میں اپنے ڈرائنگ روم کے لئے قالین خریدنا تھا ۔میں نے بڑے شوق سے ایک قالین پسند کیا جس کی زمین سفید اور درمیان میں رنگین پھول تھے۔عفت نے اُسے فوراً یوں مسترد کر دیا جس طرح وہ کسی چالاک سبزی فروش کو اُلٹے ہاتھوں باسی پالک،مولی،گاجر اور گوبھی کے پھول لوٹا رہی ہو ۔مجھے بڑا رنج ہوا،گھر آکر میں نے سارا دن اُس سے کوئی بات نہ کی۔رات کو وہ میرے پہلو میں آکر لیٹ گئی اور اپنے دونوں ہاتھ میرے گالوں پر رکھ کر کہنے لگی ،دیکھ تیرا منہ پہلے ہی بڑا گول ہے ۔جب تو ناراض ہوتا ہے تو یہ اور بھی گول مٹول ہوجاتا ہے !
آج بھلا تو اتنا ناراض کیوں ہے ؟!!!!!
میں نے قالین کی بات اُٹھائی ۔
قالین تو نہایت عمدہ ہے ،اُس نے کہا۔لیکن ہمارے کام کا نہیں !
وہ کیوں ؟؟؟؟؟ میں نے پوچھا۔
دراصل بات یہ ہے ۔۔۔۔۔جن لوگوں کے لئے یہ قالین بنا ہے اُن میں سے کوئی بھی ہمارے ہاں نہیں آتا۔
کیا مطلب ،؟؟؟؟ میں نے تلخی سے دریافت کیا۔
وہ اُٹھ کر بیٹھ گئی اور اسکول کی اُستانی کی طرح بڑی وضاحت سے گِن گِن کر سمجھانے لگی کہ ہمارے ہاں ابنِ انشاء آتا ہے ،وہ پھسکڑا مار کر فرش پر بیٹھ جاتا ہے ،ایک طرف مالٹے دوسری طرف مونگ پھلی،سامنے گنڈیریوں کا ڈھیر ! جمیل الدین عالی آتا ہے ،آتے ہی فرش پر لیٹ جاتا ہے اور سگریٹ پر سگریٹ پی کر اُن کی راکھ ٹرے میں نہیں بلکہ اپنے ارد گرد قالین پر بکھیرتا ہے ۔ممتاز مفتی ایک ہاتھ میں کھلے پان اور دوسرے ہاتھ میں زردے کی پُڑیا لئے آتا ہے ! اشفاق احمد قالین پر اخبار بچھا کر ۔۔۔۔اُس پر تربوز چیرنا پھاڑنا شروع کر دیتا ہے ! ملتان سے ایثار راعی آم اور خربوزے لے کر آئے گا ۔ڈھاکہ سے جسیم الدین ،جلیبی اور رس گُلّوں کی ٹپکتی ہوئی ٹوکری لائے گا ۔وہ سب یہ تحفے لاکر بڑے تپاک سے قالین پر سجا دیتے ہیں ۔سال میں کئی بار سید ممتاز حسین شاہ بی۔اے ،ساٹھ سال کی عمر میں ایم ۔اے انگلش کی تیاری کرنے آتا ہے اور قالین پر فاؤنٹین پین چھڑک کر اپنی پڑھائی کرتا ہے ۔صرف ایک راجہ شفیع ہے ،جب کبھی وہ مکئی کی روٹی ،سرسوں کا ساگ اور تازہ مکھن اپنے گاؤں سے لے کر آتا ہے تو آتے ہی اُنہیں قالین پر نہیں اُنڈیلتا بلکہ بڑے قرینے سے باورچی کھانے میں جا کر رکھ دیتا ہے ۔کیونکہ نہ وہ شاعر ہے نہ ادیب فقط ہمارے دوستوں کا دوست ہے۔
بات بلکل سچ تھی چناچہ ہم نے ایک نہایت میل خوردہ قالین خرید کر آپس میں صلح کرلی۔
عفت کو میرے دوستوں کے ساتھ بڑا اُنس تھا۔وہ ادیب پرست تھی اور ادب شناس بھی ۔
" شاہنامہ اسلام “ کے سینکڑوں اشعار اُسے زبانی یاد تھے۔حفیظ جالندھری کا وہ اپنے باپ کی طرح ادب کرتی تھی ۔جوش صاحب کی " یادوں کی بارات “ کی بھی مدّاح تھی ۔ایک روز میں نے کہا۔میں جوش صاحب کی طرف جا رہا تھا چلو تم بھی اُن سے مل لو ۔
تم جاؤ ، اُس نے کہا۔میرے لئے جوش صاحب کے دور کے ڈھول ہی سہانے ہیں۔
یحییٰ خان کے زمانے میں جب ہم انگلستان کے ایک چھوٹے سے گاؤں میں خاموشی سے اپنے دن گزار رہے تھے تو فیض احمد فیض لندن آئے ۔وہاں سے اُنہوں نے مجھے فون کیا کہ میں کل تمہارے پاس آ رہا ہوں ،دوپہر کا کھانا تمہارے ہاں کھاؤں گا۔
عفت نے بڑا اچھا کھانا پکایا ،سردیوں کا زمانہ تھا۔شائد برف باری ہورہی تھی لندن سے ہمارے ہاں آنے کے لئے ایک گھنٹہ ریل کا سفر تھا ۔اُس کے بعد آدھ گھنٹہ بس کا سفر ،اور پھر کوئی پندرہ منٹ پیدل !
ڈھائی تین بجے جب فیض صاحب گُھٹنے گُھٹنے برف میں دھنستے دھنساتے افتاں و خیراں ہمارے ہاں پہنچے تو عفت کی آنکھیں نمناک ہو گئیں۔کھانا گرم کرتے ہوئے اُس نے میرے دونوں ہاتھ اپنے ہاتھوں میں لئے اور بڑی عقیدت سے کہنے لگی۔
ہم کتنے خوش نصیب ہیں !
وہ کیسے ۔۔۔۔۔ ؟ میں نے پوچھا۔
ہمارے دور کا اتنا بڑا شاعر ایسے خراب موسم میں اتنی دور تم سے ملنے آیا ہے۔
یہ فیض صاحب کی مروت ہے، میں نے کہا۔
مروت نہیں،، اُس نے مجھے ٹوکا۔یہ اُن کی عظمت اور سخاوت ہے۔
ہمارے اچھے سے اچھے دنوں میں اُس کا ایک مرغوب مصرعہ یہ تھا۔
ع۔۔۔۔ رہیئے اب ایسی جگہ چل کر جہاں کوئی نہ ہو۔
اُس پر اُس نے غالباً اپنی طرف سے دوسرا مصرعہ یہ گانٹھ رکھا تھا۔
نہ زمیں ہو نہ زماں ہو ،آسماں کوئی نہ ہو
بیماری کے دنوں میں وہ بار بار پڑھا کرتی۔
ابنِ مریم ہوا کرے کوئی
میرے دُکھ کی دوا کرے کوئی
اپنے تین سال کے بے وطنی کے زمانے میں ہمیں اکثر اوقات مالی تنگیوں کا سامنا کرنا پڑا ۔ایک دفعہ جب ہم تیسری چوتھی بار نقلِ مکانی پر مجبور ہوگئے تو اُس نے بڑی محنت سے سامان باندھا۔اُس کی تھکن اُس کے بند بند سے یوں ٹپک رہی تھی جیسے شدید بارش کے بعد ٹوٹی ہوئی چھت ٹپکنے لگتی ہے ۔
میں نے اُس کے پاؤں دبا کر کہا ، عفت میری وجہ سے تمہیں کس قدر تکلیف ہورہی ہے ۔
ماں جی کی طرح وہ کبھی کبھی بہت لاڈ میں آکر مجھے " کوکا “ کہا کرتی تھی،بولی ! ارے کوکے ! میں تو تیرے ساتھ بہت خوش ہوں لیکن بےچارے ثاقب پر ترس آتا ہے ۔اس ننھی سی عمر میں یہ اُس کا آٹھواں اسکول ہوگا۔
ثاقب کی بات چھوڑو، میں نے کہا۔۔۔۔۔۔آخر ہمارا بیٹا ہے !
ہر نئے اسکول میں جاکر آسانی سے فِٹ ہوجاتا ہے لیکن تجھے اتنا تھکا ماندہ دیکھ کر مجھے ڈر لگتا ہے ۔تم ٹھیک تو ہونا ۔؟؟؟؟؟
ہاں ! ٹھیک ہی ہوں ۔۔۔۔۔۔
اُس نے اپنا سر میرے شانوں پر ٹیک کر کہا ۔مجھے اُس کے بند بند سے غالب کا شعر آہ و زاری کرتا ہوا سنائی دے رہا تھا۔
کہیں گردشِ مدام سے گھبرا نہ جائے دل
انسان ہوں پیالہ و ساغر نہیں ہوں میں
میرا خیال ہے کہ اُسی زمانے میں دربدری کی محنت و مشقّت نے اُسے وہ روگ لگا دیا جس نے انجام کا راستہ کنٹربری کے گورستان میں جا بسایا۔یہ خیال اب ہر وقت احساسِ جُرم کا تازیانہ بن کر میرے ضمیر پر بڑے بے رحم کوڑے مارتا ہے۔اب میں کیا کروں؟؟؟؟
ایک فقیر حقیر،بندہ پُر تفسیر،اسیرِ نفس شریر کو بھی کیا کہہ سکتا ہے ؟؟؟؟؟؟
جی چاہتا ہے خاک سے پوچھوں کہ اے لئیم
تو نے وہ گنج ہائے گراں مایہ کیا کیئے

UM

2011-04-09T13:25:00.004+05:00

فطرت کسی کے ظرف کو اتنا نہ آزما
ہرشخص اپنی ذات میں بڑا لاجواب ہے

:(

2011-03-26T00:09:00.002+05:00

خواب کےقیدی رہےتوکچھ نظر آتا نہ تھا
جب چلے تو جنگلوں میں راستہ بنتا گیا

Hypocrisy:(

2011-03-25T09:03:00.003+05:00

اپنی اپنی خواہشوں کے عکس میں دیکھا گیا
ایک لڑکی کویہاں کس کس طرح سوچا گیا

Shabnam Shakeel's Poetry

2011-03-24T14:30:00.001+05:00

ایک بھی گہنا پاس نہیں تھا جب یہ چہرہ کندن تھا
سونا تن پر تب پہنا جب چاندی اتری بالوں میں

From my Diary...:)

2011-03-22T22:40:00.004+05:00

ہر آدمی میں ہوتے ہیں دس بیس آدمی
لوگوں کو دیکھنا تو کئی بار دیکھنا

From my diary:)

2011-03-15T13:53:00.005+05:00

کچھ دور ہمارے ساتھ چلو ہم دل کی کہانی کہہ دیں گے
سمجھے نہ جسے تم آنکھوں سے وہ بات زبانی کہہ دیں گے
پھولوں کی طرح سے ہونٹوں پہ اک شوخ تبسم ابھرے گا
چپکے سے تمہارے کانوں میں اک بات پرانی کہہ دیں گے
اقرار وفا تم کیا سمجھو اظہار وفا تم کیا جانو۔۔۔۔۔۔۔۔۔۔۔
ہم ذکر کریں گے غیروں کا اور اپنی کہانی کہہ دیں گے

Rceived from my diary:)

2011-03-08T17:44:00.003+05:00

کسی ترنگ کسی سرخوشی میں رہتا تھا
یہ کل کی بات ہے دل زندگی میں رہتا تھا
بس ایک شام بڑی خامشی سے ٹوٹ گیا
ہمیں جو مان تیری دوستی میں رہتا تھا

from my diary.....

2011-03-05T20:32:00.005+05:00

غلط فہمی نے باتوں کو بڑھا ڈالا یونہی ورنہ!!!!!!!
کہا کچھ تھا، وہ سمجھا کچھ، مجھے کچھ اور کہنا تھا

سعداللہ شاہ۔۔۔۔

2011-03-05T20:16:00.003+05:00

کبھی تو جو پڑھنے بیٹھے مجھے حرف حرف دیکھے
تیری آنکھیں بھیگ جائیں تو کتاب بھول جائے۔۔۔۔۔۔۔۔۔۔۔
مجھے سعد جاتے جاتے فقط اتنا کہہ گیا۔۔۔۔۔۔۔۔۔
جسے دے دکھائی اچھا ، وہ خراب بھول جائے

Thanksss, Tehseen!!!

2011-03-01T14:40:00.004+05:00

چہرہ بھی اک کتاب ہے پڑھ لیجیے نا آپ
اب کیا بتائیں آپ کو اپنی زباں سے ہم۔۔۔۔۔

Recieved fro DEVI G:P

2011-03-01T14:34:00.003+05:00

مت چھیڑ ہمیں اے نکہتِ بادبہاری، جا راہ لگ اپنی
تجھے اٹھکیلیاں سوجھی ہیں، ہم بیزار بیٹھے ہیں۔۔۔۔۔

Main jab rasty se bhatka tha!!!!!!!

2011-02-28T17:49:00.003+05:00

میں نے جب لکھنا سیکھا تھا
پہلے تیرا نام لکھا تھا
تونے کیوں میرا ہاتھ نہ پکڑا
میں جب رستے سے بھٹکا تھا
پہلی بارش بھیجنے والے
میں تیرے درشن کا پیاسا تھا

میروغالب۔۔۔۔

2011-02-24T15:10:00.003+05:00

منعم کے پاس قاقم و سنجاب ہے تو کیا ہوا
اس رند کی بھی رات کٹ گئی جو کہ عُورتھا

Recieved from Rabi:)

2011-02-23T16:45:00.001+05:00

سلسلے توڑ گیا وہ سبھی جاتے جاتے
ورنہ اتنے تو مراسم تھے کہ آتے جاتے

Sahir Ludhiaanvi............

2011-02-23T16:41:00.002+05:00

تیری تڑپ سے نہ تڑپا تھا میرا دل لیکن
تیرے سکون سے بےچین ہوگیا ہوں میں

:).. recieved from my diary...

2011-02-23T14:17:00.003+05:00

اب تک میری یادوں سے مٹائے نہیں مٹتا
بھیگی ہوئی شام کا منظر، تیری آنکھیں

:(

2011-02-21T14:51:00.002+05:00

کسی اور کو میرے حال سے نہ غرض نہ کوئی واسطہ
میں بکھر گیا ہوں سمیٹ لو، میں بگڑ گیا ہوں سنوار دو

Recieved from Numaira Baji...

2011-02-18T14:23:00.001+05:00

بہت نزدیک آتے جارہے ہو
بچھڑنے کا ارادہ کر لیا ؟ کیا؟

کسے یاد اتنے حساب ہیں؟؟؟؟

2011-02-14T16:16:00.005+05:00

وہی آہٹیں دروبام پر وہی رتجگوں کے عذاب ہیں
وہی ادھ بجھی میری نیند ہے، وہی ادھ جلے مرے خواب ہیں

میرے سامنے یہ جو کہکشاں کی ہے دھند حد نگاہ تک
پرے اس کے جانے حقیقتیں یا حقیقتوں کے سراب ہیں

کبھی چاہا خود کو سمیٹنا تو بکھر کے اور بھی رہ گئے
ہیں جو کرچی کرچی پڑے ہوئےمیرےسامنے میرے خواب ہیں

یہ نہ پوچھ کیسے بسر کیے، شب و روز کتنے پہر جیے
کسے رات دن کی تمیز تھی کسے یاد اتنے حساب ہیں

Received fro My Rabi:), Noshi Gilani's Poetry

2011-02-14T16:02:00.008+05:00

کبھی تم نے یہ سوچا ہے؟
کسی کی سوچتی سادہ سی آنکھوں میں
اداسی کی خفی تحریر تم نے سب مٹا ڈالی
دھنک سپنوں کا پھر سے جال سا اک بن دیا ان میں
مگر دیکھو
ذرا سوچو
اگر اس بار بھی سپنے کسی نے توڑ ڈالے تو؟؟
وہ ان کی کرچیاں ساری کی ساری
اپنی پلکوں میں چھپالے گی
اگر اس زندگی کے بھیس میں پھر مرگ نکلی تو
گلے اس کو لگا لے گی
تم ایسا کیوں نہیں کرتے؟
ابھی سے اس کو بتلادو
تمھیں واپس بھی جانا ہے

یہاں کون اتنا قریب ہے؟؟؟؟؟؟

2011-01-28T15:42:00.005+05:00

کوئی دوست ہے نہ رقیب ہے
تیرا شہر کتنا عجیب ہے

وہ جو عشق تھا وہ جنون تھا
یہ جو ہجر ہے یہ نصیب ہے

یہاں کس کا چہرہ پڑھا کروں
یہاں کون اتنا قریب ہے

میں کسے کہوں کہ ساتھ چل
یہاں سب کے سر پر صلیب ہے

قائم نقوی کی شاعری۔۔۔

2011-01-27T14:26:00.004+05:00

بوند بوند بارش ہے
پور پور زخمی ہے
موج موج طوفاں ہے
بےسکوں دلاسے ہیں
راکھ میں شرارے ہیں
ایک ایک چہرے پر
کیسے کیسے چہرے ہیں
روزنوں میں آنکھیں ہیں
مکڑیوں کے جالوں میں
سانس سانس تصویریں
زرد زرد تحریریں
بےیقین موسم ہے

اے میرے اچھے فن کار۔۔۔۔

2011-01-21T10:51:00.004+05:00

ریت سے بت نہ بنا
اے میرے اچھے فن کار
ایک لمحے کو ٹھہر میں تجھ کو پتھر لادوں
میں ترے سامنے انبار لگا دوں
لیکن کون سے رنگ کا پتھر
تیرے کام آئے گا
سرخ پتھر جسے دل کہتی ہے یہ بے دل دنیا
یا پتھرائی ہوئی آنکھ کا نیلا پتھر
جس میں صدیوں کے تحیر کے پڑے ہوں ڈورے
اور کیا تجھے روح کے پتھر کی ضرورت ہوگی
جس پہ حق بات بھی پتھر کی طرح گرتی ہے
اک وہ پتھر ہے
جسے کہتے ہیں تہذیب سفید
اس کے مر مر میں سیاہ خون جھلک جاتا ہے
ایک انصاف کا پتھر بھی تو ہوتا ہے مگر
ہاتھ تیشہ زر ہوتو وہ ہاتھ آتا ہے
جتنے معیار ہیں اس دور کے سب پتھر ہیں
جتنے افکار ہیں اس دور کے سب پتھر ہیں
شعر بھی رقص بھی تصویروغنا بھی پتھر
میرا الہام تیرا ذہن رسا بھی پتھر
اس زمانے میں تو ہر فن کا نشاں پتھر ہے
ہاتھ پتھر ہیں تیرے ، میری زباں پتھر ہیں
ریت سے بت نہ بنا
اے میرے اچھے فنکار

بلاعنوان

2011-01-14T10:59:00.004+05:00

تیرے سبھی گلے بجا مگر بات یہ ہےدلربا
تیرا میرا معاملہ عشق کے بس کا تھا نہیں

Recieved from Numaira:)

2011-01-14T10:50:00.006+05:00

پھر قریہ دل سے اٹھا شورِقیامت جاناں
لو آج دم توڑ گئی تیری محبت جاناں
اب نہ ملیں گے کسی رہ گذرپہ تجھے
اب نہ کریں گےکبھی ایسی جسارت جاناں

بات مجھ پہ آئی تو سب خاموش ہیں۔۔۔۔۔۔۔

2011-01-10T13:52:00.004+05:00

فیصلے کی رات ہے اور لب خاموش ہیں
ایسا بھی کیا ہوا ہےکہ سب خاموش ہیں
سرِبزم کیوں کر بھر آئیں میری آنکھیں
میں کیا کہوں کہ سارے ہی سبب خاموش ہیں
اپنی صفائی میں تو سبھی نے کچھ نہ کچھ کہا
بات مجھ پہ آئی تو سب خاموش ہیں
لازم تو نہیں ہونٹوں سے ہر بات کہی جائے
آنکھوں میں میری جھانک لو وہ کب خاموش ہیں

بلاعنوان

2011-01-07T20:36:00.003+05:00

کسی دھیان میں بیٹھے بیٹھے گم ہوجاتے ہیں
اب ہم اکثر ہم نہیں رہتے، "تم" ہوجاتے ہیں

I would neverrrrrr say:(

2011-01-06T17:21:00.006+05:00

ہم کہ ٹھہرے اجنبی کتنی مداراتوں کے بعد
پھر بنیں گے آشنا کتنی ملاقاتوں کے بعد
تھے بہت بے درد لمحے ختمِ دردِعشق کے
تھیں بہت مہرصبحیں مہرباں راتوں کے بعد

Recieved from Rabi!!!!

2011-01-05T13:39:00.008+05:00

دونوں خوددار تھے ایسے کہ جدائی کا سبب
اُس نے پوچھا بھی نہیں، میں نے بتایا بھی نہیں

Tell me 2011????

2011-01-05T13:18:00.006+05:00

اے نئے سال بتا تجھ میں نیا کیا ہے؟؟؟
ہر طرف خلق نے کیوں شور مچا رکھا ہے؟؟؟
روشنی دن کی وہی، تاروں بھری رات وہی
آج ہم کو نظر آتی ہے ہر بات وہی
آسماں بدلا ہے نہ بدلی ہے یہ افسردہ زمیں

ایک ہندسے کا بدلنا کوئی بدلنا تو نہیں

اگلے برسوں کی طرح ہوں گے قرینے تیرے
کسے معلوم نہیں بارہ مہینے تیرے
بےسبب دیتے ہیں کیوں لوگ مبارک بادیں
سب کیا بھول گئے وقت کی کڑوی یادیں

تو نیا ہے تو دکھا صبح نئی شام نئی
ورنہ ان آنکھوں نے دیکھے ہیں نئے سال کئی

Recieved from Huma...

2010-12-23T16:09:00.003+05:00

اسے کہنا بچھڑنے سے محبت تو نہیں مرتی
بچھڑ جانا محبت کی صداقت کی علامت ہے
محبت ایک فطرت ہے
ہاں فطرت کب بدلتی ہے
سو جب ہم دور ہوجائیں
نئے رستوں میں کھو جائیں
تو یہ مت سوچ لینا تم
محبت مرگئی ہوگی
نہیں! ایسا نہیں ہوگا
مرے بارے میں سنکر جب تمہاری آنکھ بھر آئے
چھلک کر ایک آنسو پلک پر جو اتر آئے

تو بس اتنا سمجھ لینا
جو میرے نام سے اتنی ترے دل کو عقیدت ہے
ترے دل میں بچھڑ کر بھی ابھی میری محبت ہے

محبت!!! جو اجڑ کر بھی سدا آباد رہتی ہے
محبت ہو کسی سے تو ہمیشہ یاد رہتی ہے
محبت وقت کے بےرحم طوفاں سے نہیں ڈرتی
اُسے کہنا بچھڑنے سے محبت تو نہیں مرتی

بڑی الجھنوں میں ہوں۔۔۔ فراز احمد فراز

2010-12-23T12:54:00.003+05:00

تیرے قریب آکے بڑی الجھنوں میں ہوں
میں دوستوں میں ہوں کہ ترے دشمنوں میں ہوں
مجھ سے گریزپا ہے تو ہر راستہ بدل
میں جو سنگ راہ ہوں تو سبھی راستوں میں ہوں

ہمیں کیا برا تھا مرنا۔۔اگر ایک بار ہوتا۔۔۔۔

2010-12-20T16:48:00.003+05:00

مرے دل مرے مسافر
ہوا پھر سے حکم صادر
کہ وطن بدر ہوں ہم تم
دیں گلی گلی صدائیں
کریں رخ نگر نگر کا
کہ سراغ کوئی پائیں
کسی یار نامہ بر کا
ہراک اجنبی سے پوچھیں
جوپتا تھا اپنے گھر کا
سرکوئے ناشنائیاں
ہمیں دن سے رات کرنا
کبھی اس سے بات کرنا
کبھی اُس سے بات کرنا
تمھیں کیا کہوں کہ کیا ہے
شب غم بری بلا ہے
ہمیں یہ بھی تھا غنیمت
جوکوئی شمار ہوتا
ہمیں کیا بُرا تھا مرنا
اگرایک بار ہوتا

کھلتا کسی پہ کیوں۔۔۔۔۔

2010-12-20T14:38:00.004+05:00

کُھلتا کِسی پہ کیوں میرے دل کا معاملہ
شعروں کےانتخاب نے رُسوا کیا مجھے

از شبنم شکیل۔۔۔۔

2010-12-18T19:28:00.004+05:00

پوچھتے کیا ہو کیوں کر ہم پہنچے ہیں ایسے حالوں میں
ہم جیسے بھی پڑ جاتے ہیں دنیا کے جنجالوں میں

جس قصے کو ختم کیا جاسکتا تھا کچھ لمحوں میں
سوچ بچار ہی کرپائے ہیں اس پر اتنے سالوں میں

خوابوں سے محروم رہا کرتے ہیں دنیا جیت کے بھی
ایک کمی اکثر یہ رہ جاتی ہے جاگنے والوں میں

روزازل سے طے یہ ہواتھا کٹ جائے بس ایسے ہی
میری عمر جواب دہی میں، تیری عمر سوالوں میں

اپناآپ مٹاڈالا ہے اس بیکار سی خواہش میں
میرا ذکر کتابوں میں ہو، میراذکر رسالوں میں

چہک پرندوں کی ہی لے آتی ہے زیردام انہیں
ایک حوالہ خوش گفتاری بھی تھا میرے حوالوں میں

Recieved from MOMO...:)

2010-12-18T00:03:00.003+05:00

ہم ایک کہہ کے سنتے ہیں دوچارگالیاں
اک چھیڑ ہوگئی ہے تیرے پاسباں کے ساتھ

از شبنم شکیل۔۔۔۔۔۔ ڈائری 2010

2010-12-17T23:46:00.004+05:00

زمانہ ساز ہوتی جا رہی ہوں
مجھےروکو،سنبھلتی جارہی ہوں
نہتا کردیا ہے اس نے مجھ کو
ہراک سےصلح کرتی جارہی ہوں

From my Diary.

2010-12-17T23:35:00.006+05:00

پہاڑوں سے اتر کر وادیوں میں رنگ بھرنا ہے
مجھے رستے کے سارے پتھروں کو ریت کرنا ہے

ناصرکاظمی۔۔۔۔۔

2010-12-15T22:00:00.004+05:00

ہزاررستےہیں اہل دل کے،بس ایک منزل ہےبوالہوس کی
یہی فرق ہے اس میں ، ہم میں، گزرگئے ہم، ٹھہر گیا وہ

سچائی مرگئی ہے۔۔۔۔۔۔

2010-12-15T21:39:00.003+05:00

اندھی بصارتیں ہیں
بہری سماعتیں ہیں
گونگے ہیں لفظ سارے
ہر نقش عارضی ہے
ہرخواب رائیگاں ہے
دھندلے ہیں عکس سارے
شبنم گلاب خوشبو
سب شاعروں کی باتیں
سب جھوٹ سب فسانے
دھوکہ بنی محبت
نہ معتبر وفائیں
ایسی ہوا چلی ہے
سچائی مرگئی ہے

کون کہاں تک چل سکتا ہے؟؟؟؟ شاعر ،زاہد منیر عامر

2010-12-15T21:15:00.004+05:00

اپنے گریباں، درداپنے ہیں
اپنے اپنے سپنے ہیں
کچھ لمحوں میں پیاراترکر
اک زنجیر بنا دیتا ہے
من اور تو کی صدیوں کو
کچھ لمحوں میں الجھادیتا ہے
لمحے صدیاں بن نہیں پاتے
رستے الجھےرہ جاتے ہیں
الجھے سلجھے رستوں پر
وعدوں کے پھول کھلا نہیں کرتے
پھول کہاں تک کھل سکتے ہیں
پھول کہاں تک چل سکتے ہیں
رستے تنہا رہ جاتے ہیں
کون کہاں تک چل سکتا ہے

Recieved from..Rabi....

2010-12-15T16:45:00.003+05:00

وہ ایک شخص مجھے ساری عمر ترسے گا
نصیب اُس کے کہ اُس نے مجھے گنوانا تھا

بلاعنوان۔۔۔

2010-12-15T16:38:00.001+05:00

ایک نقطے نے محرم سے مجرم بنادیا
ہم دعا لکھتے رہے ، وہ دغا پڑھتے رہے

ناصرکاظمی۔۔۔۔بہت دنوں سے طبیعت مری اداس نہیں۔۔۔۔

2010-12-07T15:11:00.003+05:00

وہ دلنوازہےلیکن نظرشناس نہیں
مراعلاج مرےچارہ گر کے پاس نہیں

تڑپ رہے ہیں زباں پر کئی سوال مگر
مرےلیےکوئی شایانِ التماس نہیں

ترےجلو میں بھی دل کانپ کانپ اٹھتا ہے
مرےمزاج کو آسودگی بھی راس نہیں

کبھی کبھی جو ترے قرب میں گزارے تھے
اب ان دنوں کا تصوربھی مرےپاس نہیں

مجھے یہ ڈر ہے تری آرزو نہ مٹ جائے
بہت دنوں سے طبیعت مری اداس نہیں

بلاعنوان۔۔۔۔

2010-12-04T22:39:00.003+05:00

میرے کمرے میں پڑے ہیں

میری قسمت کے نجوم

ہر طرف بکھرے رسالے

اور کتابوں کا ہجوم

اب جگہ کافی نہیں ہے

میرے رہنے کے لیے

میں نے کتنا پڑھ لیا ہے؟

کچھ نہ کہنے کے لیے

Recieved from Tehseen..:)

2010-12-04T22:32:00.003+05:00

اسے کہنا دسمبر آن پہنچا ہے

ہوائیں سرد ہیں وادیاں بھی دھند میں گم ہیں

پہاڑوں نے برف کی شال پھر سے اوڑھ رکھی ہے

سبھی رستے تمہاری یاد میں پُرنم سے لگتے ہیں

جنھیں شرفِ مسافت تھا

وہ سارے کارڈز

وہ پرفیوم

وہ چھوٹی سی ڈائری

وہ ٹیرس

وہ چائے

جو ہم نے ساتھ میں پی تھی

تمہاری یاد لاتے ہیں

تمہیں واپس بلاتے ہیں

اسے کہنا کہ

دیکھو ! یوں ستاؤ نا

دسمبر آن پہنچا ہے

سنو ! تم لوٹ آؤ نا

مجسمہ ساز۔۔۔۔۔۔ ایک کہانی، بڑی پرانی۔۔از منیرالدین احمد

2010-12-04T19:29:00.004+05:00

چین کے بادشاہ اکیلے نہ مرتے تھے

ان کے ساتھ مرنا ہوتا تھا

حرم کی رانیوں کو

محل کی لونڈیوں کو

گھربار کی باندیوں کو

شاہی پہرہ داروں کو

فوج کی ایک پوری پلٹن کو

گھوڑوں اورخچروں کو

کتوں اور بلیوں کو

یہ رسم جاری رہی

اس روز تک

جب ایک مجسمہ ساز کو

ایک انوکھی تجویز سوجھی

زندوں کی جگہ

مجسموں کو بادشاہ کی

قبرمیں دفن کرنے کی

بادشاہ کی زندگی میں

سارے مجسمے تیار کیے گئے

ان لوگوں کے

جنھیں وہ اگلے جہاں میں

اپنی معیت میں دیکھنا چاہتا تھا

ایک وسیع و عریض قبر میں

ان کو ایستادہ کردیاگیا

بادشاہ کی موت کے انتظارمیں

اور جب بادشاہ مرا تو

خوشیاں منائی گئیں

ماتم کی بجائے

کیوںکہ رانیوں اور درباریوں

محل کے باسیوں اور

ہزاروں لشکریوں کی جانیں

جو بچ گئی تھیں

نہ بچ سکی تو

صرف مجسمہ ساز کی جان

اس کو بادشاہ کے دائیں ہاتھ پر

زنجیروں سے جکڑ دیا گیا

قبر پر منوں مٹی ڈالنے سے پہلے

اسے اگلے جہاں میں

مجسموں میں روح پھونکنی ہوگی

اور شاید بادشاہ کو

مزید لشکریوں کی ضرورت پڑ جائے

وصیت۔۔۔۔ داغ دہلوی

2010-12-04T19:23:00.002+05:00

دن گزارے عمر کے انسان ہنستے بولتے

جان بھی نکلے تو میری جان ہنستے بولتے

آسماں برسوں رلاتا ہے لگا دیتا ہے چپ

دیکھ لیتا ہے اگر اک آن ہنستے بولتے

خامہ فرسائی

2010-11-30T13:49:00.007+05:00

مزاج ہم سے زیادہ نہ تھا جدا اُس کا
جب اپنے طورتھے یہی تو کیا گلہ اُس کا

وہ تھا اپنے زعم میں، رہا بےخبر مجھ سے
اُسے خبر بھی نہ تھی، میں نہیں رہا اُس کا

بلاعنوان۔۔۔۔

2010-11-29T16:31:00.004+05:00

ہجرکی شب میں قید کرے یاصبح وصال میں رکھے
اچھا مولا! تیری مرضی تو جس حال میں رکھے

آج۔۔۔۔۔۔۔

2010-11-28T19:29:00.001+05:00

افسانوں کی دنیا میں سب جھوٹ نہیں ہوتا

دل اور بھی الجھے گا، پڑھیے نہ کتابوں کو

آئینہ پتھروں میں رہتا ہے۔۔۔۔۔۔۔از :ڈاکٹر فخرالحق نوری

2010-11-25T18:33:00.003+05:00

دل عجب وسوسوں میں رہتا ہے
آئینہ پتھروں میں رہتا ہے
واہمے کے سوا یہ کچھ بھی نہیں
چاند کب پانیوں میں رہتا ہے
میں ترستا ہوں آدمی کے لیے
جانے کن بستیوں میں رہتاہے
کس کی تسبیح کررہے ہیں طیور
کون ان زمزموں میں رہتا ہے
دھڑکنوں کا کچھ اعتبار نہیں
اور وہ دھڑکنوں میں رہتا ہے

آج کل۔۔۔۔۔

2010-11-07T16:55:00.002+05:00

ضبط کہتا ہےخاموشی سےبسرہوجائے

درد کہتا ہے کہ دنیا کو خبر ہو جائے

ہمیں معلوم ہی کب تھا۔۔۔۔۔۔۔۔بہت معصوم تھے ہم بھی۔۔۔

2010-11-07T16:37:00.006+05:00

ہمیں اب یاد آتا ہے

بہت معصوم تھے ہم بھی

ہم اک اجنبی کو عمر کی تاریک راہوں میں

سہارا مان بیٹھے تھے

کہ اس کے چاند چہرے کو

ہم اپنے بخت کا روشن ستارا مان بیٹھے تھے

ہمیں معلوم ہی کب تھا

کہ دشت زندگی میں

سہارے چھوٹ جاتے ہیں

کبھی ایسا بھی ہوتا ہے

نظر جن پہ ٹھہرتی ہے

وہ تارے ٹوٹ جاتے ہیں۔۔۔۔۔۔

بارش۔۔۔۔۔

2010-11-03T15:32:00.002+05:00

بادل نے کل رات کو

مجھ کو روتے دیکھا تھا

یہ منظر اس کو اتنا بھایا

کہ

رات سے پانی برس رہا ہے

جواب آنکھوں سے ایسے کمال دیتا ہے۔۔۔۔۔۔۔۔۔

2010-11-01T19:51:00.002+05:00

وہ بندگی کی ایسی مثال دیتا ہے

آوارگی کو شریعت میں ڈھال دیتا ہے

وہ خوش کلام ہےاس درجہ بات کرنے میں

کہ حرف حرف کو حسن و جمال دیتا ہے

میں اس کا ساتھ جو مانگوں زندگی بھر کو

بڑے حسین طریقے سے ٹال دیتا ہے

یہ جان کر بھی میرا وہ ہونہیں سکتا

وہ دیکھتا ہے یوں کہ شش وپنج میں ڈال دیتا ہے

سوال جیسے پناہ مانگتے ہوں آنکھوں سے

جواب آنکھوں سے ایسے کمال دیتا ہے

ورنہ ہر ایک سانس قیامت اسے بھی تھی۔۔۔۔۔۔

2010-11-01T19:45:00.002+05:00

ذکرِشبِ فراق سے وحشت اسے بھی تھی

میری طرح کسی سے محبت اسے بھی تھی

وہ مجھ سےبڑھ کے ضبط کا عادی تھا جی گیا

ورنہ ہرایک سانس قیامت اسے بھی تھی

سنتا تھا دوسروں سے وہ سچی کہانیاں

شاید رفاقتوں کی ضرورت اسے بھی تھی

ایک شعر۔۔۔۔۔

2010-11-01T19:42:00.002+05:00

اس شخص کے پہلو میں سکوں اتنا کیوں ہے

گرجا نہیں ، مندر نہیں، کعبہ بھی نہیں وہ۔۔۔۔۔

یہ دیکھ تیرے ہاتھ میں پتھر بچا نہ ہو۔۔۔۔۔۔۔

2010-10-25T17:33:00.003+05:00

اتنا بھی اپنی ذات سے کوئی جدا نہ ہو

نکلے تری تلاش میں ،اپنا پتا نہ ہو

دیکھو کہ پھر ہواؤں کے تیور بدل گئے

ساحل کی ریت پر کوئی کچھ لکھ رہا نہ ہو

تنہائیاں کچھ ایسے بستی ہیں میرے ساتھ

عکس بھی شجر سے جیسے جدا نہ ہو

نہ کر تو میرے جسم کے زخموں کا یوں حساب

یہ دیکھ تیرے ہاتھ میں پتھر بچا نہ ہو

اپنوں سے بھی ملوں تو یہ خوف سا رہے

چہرے کے پیچھے کوئی چہرہ چھپا نہ ہو

سنو!!!!۔

2010-10-12T10:31:00.003+05:00

سنو !تم عزم والے ہو

بلا کا ضبط رکھتے ہو

تمھیں کچھ بھی نہیں ہوگا

مگر دیکھو!۔

جسے تم چھوڑے جاتے ہو

اُسے تو ٹھیک سےشاید

بچھڑنا بھی نہیں آتا

سنو! تم عزم والے ہو

اُسے مت چھوڑ کر جاؤ

صدا سسکیوں کی سنائی نہ دے۔۔۔۔

2010-10-11T13:03:00.002+05:00

خدا ہم کو ایسی خدائی نہ دے

کہ اپنے سوا کچھ دکھائی نہ دے

ہنسو آج اتنا کہ اس شور میں

صدا سسکیوں کی سنائی نہ دے

مجھے اپنی چادر میں یوں ڈھانپ لو

زمیں آسماں کچھ دکھائی نہ دے

خطاوار سمجھے گی دنیا تجھے

اب اتنی زیادہ صفائی نہ دے

خدا ایسے احساس کا نام ہے

رہے سامنے اور دکھائی نہ دے

آخر گناہ گار ہوں کافر نہیں ہوں میں۔۔۔۔ شاہکارِ غالب

2010-10-09T13:28:00.006+05:00

دائم پڑا ہوا تیرے در پر نہیں ہوں میں

خاک ایسی زندگی پہ پتھر نہیں ہوں میں

کیوں گردش مدام سے گھبرا نہ جائے دل

انسان ہوں پیالہ و ساغر نہیں ہوں میں

یارب زمانہ مجھ کو مٹاتا ہے کس لیے

لوحِ جہاں پہ حرفِ مکرر نہیں ہوں میں

حد چاہیے سزا میں عقوبت کے واسطے

آخر گناہ گار ہوں کافر نہیں ہوں میں

سنو تم کو سناتے ہیں ہم کاروبار کے قصے۔۔۔۔

2010-10-04T09:29:00.003+05:00

بہت فرسودہ لگتے ہیں مجھے اب یار کے قصے

گل و گلزار کی باتیں لب و رخسار کے قصے

بھلا عشق و محبت سے کسی کا پیٹ بھرتا ہے؟

سنو! تم کو سناتے ہیں ہم کاروبار کے قصے

میرے احباب کہتے ہیں یہی اک عیب ہے ہم میں

سرِدیوار لکھتے ہیں پسِ دیوار کی باتیں

ہم اکثر اس لیے لوگوں سے جا کر خود نہیں ملتے

وہ بےکار کی باتیں ، وہی بےکار کے قصے

رت جگا۔۔۔۔

2010-10-04T09:21:00.002+05:00

سنا ہوگا کہ درد کی اک حد بھی ہوتی ہے

ملو ہم سے کہ ہم اس حد کے اکثر پار جاتے ہیں

زباں سے روٹھ گیا پھرسوال کا موسم۔۔۔۔۔۔

2010-10-04T09:17:00.003+05:00

فراق یار کی بارش ملال کا موسم

ہمارے شہر میں اترا کمال کا موسم

وہ اک دعا جو میری نامراد لوٹ آئی تھی

زباں سے روٹھ گیا پھر سوال کا موسم

جو بےیقیں ہوں تو بہاریں اجڑ بھی سکتی ہیں

تو آکے دیکھ لے مرے زوال کا موسم

۔۔۔۔۔۔۔۔۔۔۔۔۔۔۔۔۔۔۔۔

2010-09-27T23:00:00.004+05:00

چند مکروہ ذہن

کثافتوں کو بڑھارہے ہیں

منافقت کو نبھا رہے ہیں

پستہ قد بہروپیے

زیتون کی ٹہنی لیے

اپنی اپنی چھتریوں سے

کبوتروں کو اڑا رہے ہیں

سمجھنے والا سمجھ چکا ہے

کسے تماشا دکھارہے ہیں؟

ایک شعر۔۔۔

2010-09-27T22:55:00.001+05:00

ہم دوہری اذیت کے ہیں گرفتار مسافر

کہ پاؤں ہیں شل ، شوقِ سفر بھی نہیں جاتا

جو آئے تیسرا دانہ یہ ڈوری ٹوٹ جاتی ہے۔۔۔۔

2010-09-18T15:37:00.003+05:00

مکمل دو ہی دانوں پر یہ تسبیحِ محبت ہے

جو آئے تیسرا دانہ ، یہ ڈوری ٹوٹ جاتی ہے

مقرر وقت ہوتا ہے محبت کی نمازوں کا

ادا جن کی نکل جائے قضا بھی چھوٹ جاتی ہے

محبت کی نمازوں میں امامت ایک کو سونپو

اسے تکنے اُسے تکنے سے نیت ٹوٹ جاتی ہے

محبت دل کا سجدہ ہے جو ہے توحید پر قائم

نظر کے شرک والوں سے محبت روٹھ جاتی ہے

روایت۔۔۔۔

2010-09-16T17:37:00.002+05:00

کسی کے یوں بچھڑنے پر

کسی کی یاد آنے پر

بہت سے لوگ روتے ہیں

کہ رونا اک روایت ہے

محبت کی علامت ہے

میں ان پرپیچ راہوں پر

غمِ جاناں سے گھبرا کر

روایت توڑ جاتی ہوں

تمھاری یاد آنے پر

میں اکثر مسکراتی ہوں

بچھڑنے سے ذرا پہلے۔۔۔۔۔۔۔

2010-08-27T13:59:00.003+05:00

اگر کبھی میری یاد آئے تو

تو چاند راتوں کی نرم دلگیر روشنی میں

کسی ستارے کو دیکھ لینا

اگر وہ نخل فلک سے اڑ کے

تمھارے قدموں میں آگرے تو

یہ جان لینا

وہ میرا دل تھا

اگر نہ آئے۔۔۔۔۔۔۔۔۔۔۔۔۔۔۔۔۔

مگر یہ ممکن ہی کس طرح ہے

کہ

تم کسی پہ نگاہ ڈالو

اور

اس کی دیوار جاں نہ ٹوٹے

وہ اپنی ہستی نہ بھول جائے

اگر کبھی میری یاد آئے

تو گریز کرتی ہوا کی لہروں پہ ہاتھ رکھنا

میں خوشببوؤں میں تمھیں ملوں گی

میں گرد ہوتی مسافتوں تمھیں ملوں گی

کہیں پہ روشن چراغ دیکھو تو جان لینا

کہ

ہر پتنگے کے ساتھ میں بھی سلگ چکی ہوں

تم اپنے ہاتھوں سے ان پتنگوں کو خاک دریا میں ڈال دینا

میں خاک بن کے سمندروں میں سفر کروں گی

کسی نہ دیکھے ہوئے جزیرے پہ رک کے

تم کو صدائیں دوں گی کہ

سمندروں کے سفر پہ نکلو

تو

اُس جزیرے پہ بھی رکنا

اگر کبھی میری یاد آئے تو۔۔۔۔۔

بچھڑنے سے ذرا پہلے۔۔۔۔۔۔۔۔۔

2010-08-27T13:50:00.003+05:00

نہ وعدہ تھا کوئی تم سے

کوئی رشتہ نبھانے کا

نہ کوئی اور ہی دل میں تہیہ یا ارادہ تھا

نہ تم اس داستاں کے سرسری کردار تھے کوئی

نہ قصہ اتنا سادہ تھا

تعلق میں جو سمجھی تھی

کہیں اس سے زیادہ تھا

ہنستے ہنستے۔۔۔۔

2010-07-30T16:45:00.002+05:00

نہ جانے کب ملے فرصت

اسی لمحے چلے آو

نہ جانےکب ملے فرصت

کہ جب تم بھی نہ مل پاو

کہ جب میں بھی نہ مل پاوں

!!!!

تمھیں شکوے سنانے ہیں

مجھے آنسو بہانے ہیں

تمھیں الزام دینا ہے

مجھے بے دام رہنا ہے

تمھارے نام کی ٹیبل

کسی کیفے کے گوشے میں

ڈنر کے واسطے بُک ہے

مجھے بھی شام کی چائے

کسی کے ساتھ پینا ہے

نئی خوشبو ہے پیرس کی

جو تم کو ساتھ لینا ہے

مجھے بھی ٹائی کا پیکٹ نئی پیکنگ میں لینا ہے

تو کیوں نہ شام سے پہلے کسی لمحے میں مل جائین

خزاں کی دھوپ پھیلی ہے

ہوا بھی تھوڑی گیلی ہے

اداسی کا فسون سا ہے

جنوں میں اک سکوں سا ہے

یہ موسم ہے بچھڑنے کا

اسی رُت میں بچھڑ جاو

ابھی آو

بچھڑ جاو

اس نے پوچھے تھے جدائی کے معانی مجھ سے۔۔۔۔

2010-07-22T12:51:00.003+05:00

آکے لے جا میری آنکھ کا پانی مجھ سے

کیوں حسد کرتی ہے دریا کی روانی مجھ سے

گوشت ناخن سے الگ کر کے دکھایا

اُس نے پوچھے تھے جدائی کے معانی مجھ سے

تیری خوشبو کی لحد پہ میں بڑی دیر سے کھڑا تھا

روپڑی تھی مل کے رات کی رانی مجھ سے

ختم ہونے لگا جب خوں بھی اشکوں کی طرح

کرگئے خواب بھی میرے نقل مکانی مجھ سے

لاحاصل

2010-07-01T13:33:00.003+05:00

وہ لوگ ہی قدموں سے زمیں چھین رہے ہیں
جو لوگ میرے قد کے برابر نہیں آتے
اک تم کہ تمہارے لیے میں بھی میری جاں بھی
اک میں کہ مجھے تم بھی میسر نہیں آتے
جس شان سے لوٹے ہیں گنواکر دل و جاں ہم
اس طور سے تو ہارے ہوئے لشکر نہیں آتے
کوئی تو خبر لے میرے دشمن جان کی

کئی روز سے مرے صحن میں پتھر نہیں آتے

دل بھی کوئی آسیب کی نگری ہے محسن

جو اس سے نکل جاتے ہیں مڑ کر نہیں آتے

۔۔۔۔۔۔۔۔۔۔۔۔۔

2010-04-13T14:30:00.002+05:00

تعلق میں عجب حسن ِ توازن کارفرما ہے
طلب حد سے نہیں بڑھتی ضرورت کم نہیں ہوتی

کتابیں۔۔۔۔۔۔۔۔۔۔۔۔۔۔۔۔۔۔ ازگلزار

2010-03-25T10:07:00.001+05:00

کتابیں جھانکتی ہیں بند الماری کے شیشوں سے

بڑی حسرت سے تکتی ہیں

مہینوں اب ملاقاتیں نہیں ہوتیں

جو شامیں ان کی صحبت میں کٹا کرتی تھیں ، اب اکثر

گزر جاتی ہیں کمپیوٹر کے پردوں پر

بڑی بےچین رہتی ہیں

انہیں اب نیند میں چلنے کی عادت ہوگئی ہے

بڑی حسرت سے تکتی ہیں

جو قدریں وہ سناتی تھیں۔۔۔۔۔

کہ جن کے سیل کبھی مرتے نہیں تھے

وہ قدریں اب نظر آتی نہیں گھر میں

جو رشتے وہ سناتی تھیں

وہ سارے ادھڑے ادھڑے ہیں

کوئی صفحہ پلٹتا ہوں تو اک سسکی نکلتی ہے

کئی لفظوں کے معنی گرپڑے ہیں

بنا پتوں کےسوکھے ٹنڈ لگتے ہیں وہ سب الفاظ

جن پر اب کوئی معنی نہیں اگتے

بہت سی اصطلاحیں ہیں ۔۔۔۔

جو مٹی کے سکوروں کی طرح بکھری پڑی ہیں

گلاسوں نے انہیں متروک کرڈالا

زباں پہ ذائقہ آتا تھا جو صفحے پلٹنے کا

اب انگلی کلک کرنے سے بس اک

جھپکی گزرتی ہے۔۔۔۔۔

بہت کچھ تہہ بہ تہہ کھلتا چلا جاتا ہے پردے پر

کتابوں سے جو ذاتی رابطہ تھا کٹ گیا ہے

کبھی سینے پہ رکھ کے لیٹ جاتے تھے

کبھی گودی میں لیتے تھے

کبھی گھٹنوں کو اپنے رحل کی صورت بناکر

نیم سجدے میں پڑھا کرتے تھے چھوتے تھے جبیں سے

خدا نے چاہا تو وہ سارا علم تو ملتا رہے گا بعد میں بھی

مگر وہ جو کتابوں میں ملا کرتے تھے سوکھے پھول

کتابیں مانگنے گرنے اٹھانے کے بہانے رشتے بنتے تھے

ان کا کیا ہوگا

وہ شاید اب نہیں ہوں گے

دیر آمد۔۔۔۔۔گلزار کی شاعری

2010-03-25T09:37:00.003+05:00

آٹھ ہی بلئین عمر زمیں کی ہوگی شاید
ایسا ہی اندازہ ہے کچھ سائنس کا
چار اعشاریہ چھ بلین سالوں کی عمر تو بیت چکی ہے
کتنی دیر لگادی تم نے آنے میں
اور اب مل کر
کس دنیا کی دنیاداری سوچ رہی ہو
کس مذہب کی ذات پات کی فکر لگی ہے
آو چلیں اب
تین ہی بلئین سال بچے ہیں

آئینہ۔۔۔۔۔۔۔۔۔۔۔۔۔۔۔۔۔۔از روشنی

2010-03-22T17:15:00.005+05:00

منافقت سے بھری یہ دنیا
جس کے رگ و پے میں
خود غرضی اور تصنع کا زہر بھرا ہے
عیاری کے لبادے میں ملبوس
بے چہرہ لوگ
جو کسی جنگلی درندے سے بھی زیادہ
بھیانک ہیں
نرم لہجوں میں ملفوف
اپنائیت کے بناوٹی جذبے۔۔۔۔۔۔۔۔
جو اکثر راہ کھوٹی کرتے ہیں
اس تعفن زدہ ماحول میں تو
سانس لینا بھی دوبھر ہے
اور لوگ اسے زندگی کہتے ہیں

خوشی۔۔۔۔۔۔۔۔۔۔۔از روشنی

2010-03-19T17:26:00.001+05:00

خوشی ----احساس کے بے کراں سمندر کا

اک گمنام جزیرہ ہے

اَن دیکھا اور ان جانا سا سفر

سبھی اُس کی تلاش میں بھٹکتے ہیں

پر کبھی پہنچ نہیں پاتے

آخر تھک ہار کر --- بےبس ہوکر شاید

پڑاو ہی کو منزل سمجھ لیتے ہیں

میں اور تم ۔۔۔۔۔۔۔۔۔۔۔۔۔از روشنی

2010-03-19T17:19:00.004+05:00

میں اور تم
ندی کے دوکنارے
تعلق۔۔۔۔۔۔۔۔۔۔۔۔۔۔۔۔۔۔۔
اِن کناروں میں بہتا پانی
اِسے میلا نہ ہونے دو

ایک شعر۔۔۔۔۔۔۔۔۔۔

2010-03-17T10:52:00.002+05:00

آدم خور درندے فارغ بیٹھ گئے

جب سے دہشت پر مائل انسان ہُوئے

خوف ۔۔۔۔۔۔۔۔از روشنی

2010-03-10T17:23:00.003+05:00

اک خوف بچپن سے میرے من میں چھُپا ہے
کھودینے کا خوف۔۔۔۔۔۔۔
میں نے برسوں کِسی کو اپنا نہ کیا
شاید مجھ میں کھودینے کی ہمت نہیں تھی
میں نے کبھی خوشیوں کی خواہش بھی نہیں کی
خوشیاں ہمیشہ ریت کی مانند میری مٹھی سے پھسل جاتی تھیں
تب میں نے خوشیاں بانٹنا سیکھا
اور دن بدن مضبوط تر ہوتی گئی
پر اب۔۔۔۔۔۔۔۔
میری ذات کے قلعے میں دراڑ پڑنے لگی ہے
۔۔۔۔۔
مجھے پھر سے خوشیوں کی خواہش ہونے لگی ہے
!!!!!!!!!!!!
اور وہ بچپن کا خوف۔۔۔۔۔۔۔۔۔۔۔

Ego..........

2010-03-08T09:14:00.002+05:00

کبھی سوچا ہے تم نے یہ
اگر ہم مِل بھی جائیں تو
گزارا ہونہیں سکتا
نہ تم خود کو میرے سانچے میں ڈھالوگے
نہ میں اپنی روِش کو چھوڑ پاوں گی
تم اپنے عشق پہ نازاں
مَیں اپنے حُسن پہ فاخر
یوں ہم دونوں
اپنی اپنی جگہ پہ
انا کے خول میں لپٹے ہوئے
ریشم کے کیڑے ہیں
ناممکن کمپرومائز
نہ سمجھوتے کی گنجائش
تو کیا بہتر نہیں ہے یہ
کہ ہم دونوں
بچھڑنے کی اذیت سے ہی نہ گزریں
نہ تم کو یاد آوں میں
نہ مجھ کو یاد آو تم
تمھیں میں بھول جاوں اور
مجھے بھی بھول جاو تم

خوبصورت موڑ۔۔۔۔۔ ساحر لدھیانوی

2010-02-12T16:15:00.006+05:00

چلو اک بار پھر سے اجنبی بن جائیں ہم دونوں

نہ میں تم سے کوئی امید رکھوں دل نوازی کی
نہ تم میری طرف دیکھو غلط انداز نظروں سے
نہ میرے دل کی دھڑکن لڑکھڑائے میری باتوں میں
نہ ظاہر ہو تمھاری کشمکمش کا راز نظروں سے
چلو اک بار پھر سے اجنبی بن جائیں ہم دونوں

تمھیں بھی کوئی الجھن روکتی ہے پیش قدمی سے
مجھے بھی لوگ کہتے ہیں کہ یہ جلوے پرائے ہیں
میرے ساتھ بھی رسوائیاں ہیں میرے ماضی کی
تمھارے ساتھ بھی گزری ہوئی راتوں کے سائے ہیں
چلو اِک بار پھر سے اجنبی بن جائیں ہم دونوں

تعارف روگ بن جائے تو اُس کا بھولنا بہتر
تعلق بوجھ بن جائے تو اُس کا توڑنا اچھا
وہ افسانہ جسے تکمیل تک لانا نہ ہو ممکن
اُسے اِک خوبصورت موڑ دے کر چھوڑنا اچھا

چلو اک بار پھر سے اجنبی بن جائیں ہم دونوں